Академикот Владо Камбовски смета дека не треба да се одржи реферндум во Македонија за одобрување на членството во НАТО кога пристапниот Протокол ќе биде ратификуван од сите земји-чќенки на Алијансата.

Ова професорот го истакна  на конференцијата на МАНУ - „Градење на вредносен и безбедносен систем: Услови за интеграција во НАТО“. Членот на МАНУ смета дека доволно е само одлука на Собранието и ратификација на Вашингтонскиот договор за земјата формално и официјално да влезе во сојузот.

- Уставот не предвидува никаква друга процедура, не предвидува никаков референдум, бидејќи НАТО не е сојуз на држави, туку во себе обединува врз принципи на координација и интероперабилност и зачувување на суверенитетот на секоја држава. Уставот предвидува референдум само ако се работи за пристап кон сојуз на држави ако притоа значи пренесување на одредени суверени надлежности и права на државата на некои супранационални или заеднички институции, што во случајов не е така, изјави денеска членот на МАНУ.

На конференцијата присуствуваа и вицепремиерката Радмила Шечеринска, поранешниот хрватски претседател Иво Јосиповиќ, францускиот амбасадор Кристијан Тимоние, претседателот на МАНУ, Таки Фити, и други.

Македонија се очекува да стане најнова членка на евро-атлантскиот пакт на почетокот од следната година.