Македонскиот премиер, Зоран Заев со грчкиот колега,  Алексис Ципрас последен пат се сретнале во Лондон и Брисел, а како што кажа Заев во разговорите останува меѓусебното храбрење и иницијативите за пријателство, но и склучување на стратешки договори меѓу двете земји.

„Разговараме некаде наесен да ги подготвиме договорите што две соседни земји не може да ги немаат како договори, а тоа е за Заштита на инвестициите, Договорот за отстранување на двојното оданочување меѓу двете земји и многу, многу други договори. Тоа за мене значеше и обврска да пренесам во институциите да почнат со подготовката за билатералната комуникација со Грција“-  вели Заев.

Премиерот кажа дека по спроведување на референдумот во земјава и ратификација на договорот во грчкиот Парламент, граѓаните ќе очекуваат и да ги видат конкретните ефекти и поволности од овој договор за пријателство и стратешко партнерство со Грција.