Ескалацијата на конфликтот на Блискиот Исток отвори прашања за можните последици врз туризмот на Јадранот, цените на енергенсите и очекувањата од претстојната летна сезона.

Иако од Министерството за туризам на Хрватска велат дека засега не очекуваат поголеми потреси, туристичките работници предупредуваат дека резервациите веќе се одвиваат побавно, а сезоната може да се решава во последен момент.

Државната секретарка во Министерството за туризам и спорт, Моника Удовичиќ, изјави дека ситуацијата на Блискиот Исток била неочекувана, но дека по разговорите со партнерите од клучните пазари не се очекува значително намалување на туристичкиот промет.

„Како што изгледа сега, конфликтот не би требало значително да влијае врз туризмот во Хрватска, бидејќи околу 80 проценти од гостите доаѓаат од европските пазари“, изјави Удовичиќ.

Сепак, таа предупреди дека нестабилноста во светот никогаш не е добра за туризмот, бидејќи сигурноста и мирот се основни предуслови за патувања.

Поскапувањето на горивото како прв удар

Еден од првите ефекти од кризата веќе се чувствува преку наглиот раст на цените на горивата, што директно влијае врз трошоците за патување и туристичките аранжмани.

„Видовме дека цените на нафтените деривати нагло пораснаа и тоа брзо се почувствува и кај нас“, изјави Удовичиќ, додавајќи дека реакцијата на владата за стабилизирање на цените била навремена.

Туристичките агенции предупредуваат: резервациите доцнат

Претседателот на Здружението на туристички агенции при Хрватската стопанска комора, Борис Жгомба, смета дека ситуацијата треба да се гледа во контекст на целата година.

Според него, резервациите и пред почетокот на кризата биле побавни од лани, а актуелната геополитичка ситуација дополнително ја комплицира состојбата.

„Дури и ако конфликтот заврши утре, последиците ќе се чувствуваат. Не станува збор само за воена опасност, туку и за синџирот ефекти – од поскапување на енергенсите до инфлација“, вели Жгомба.

Тој предупредува дека оваа туристичка сезона би можела да се решава во последен момент, со таканаречени „last minute“ резервации, што носи дополнителна нестабилност на пазарот.

Гостите чекаат да видат што ќе се случи

Претседателката на Хрватската асоцијација за семејно сместување, Барбара Марковиќ, истакнува дека геополитичката ситуација ги прави гостите повнимателни.

„Гостите чекаат да видат како ќе се развива ситуацијата. Оваа криза создава несигурност и кај туристите и кај издавачите на сместување“, вели таа.

Според неа, сепак има и позитивни трендови – зголемен интерес за куќи за одмор, а се очекува многу туристи да избираат поблиски дестинации до кои може да се стигне со автомобил.

Најголем пад на резервациите засега се забележува на далечните пазари, како САД и Австралија, додека резервациите од европските земји засега остануваат стабилни.

Експертите предупредуваат дека развојот на туристичката сезона ќе зависи од тоа колку долго ќе трае кризата и дали ќе продолжи растот на цените на енергенсите, што може директно да влијае врз цените на туристичките аранжмани.