Има приближување на позициите на Заедничкиот интердисциплинарен комитет на експерти меѓу Македонија и Грција во делот на стратегијата за надминување на разликите околу учебниците.

Ова е заклучокот од последната средба на работните групи која се одржа на 22 и 23 месецoв, информираше денеска амбасадорот и копретседател на македонскиот дел на комитетот, Виктор Габер. Содржината на учебниците во двете земји ќе се прави според стандардите на Советот на ЕУ и УНЕСКО, а досега разгледувани зе учебниците по историја и географија за основно училиште, но и учебниците за етика и социологија. Ќе треба да се „испеглаат“ деловите од учебниците кои содржат иредентизам и за двете страни.

„Атмосферата беше колегијална, конструктивна, се работи за два концепта кои треба да се усогласат, бидејќи се работи за два образовни система кои со години се граделе и си имаат своја историја, а треба да имаат заедничка иднина“, рече Габер.

Тој додава дека во учебниците треба да се избегнува она што претставува анимозитет, непријатност. 

Ќе се разгледува и присуството на Граѓанската војна во грчките учебници. 

На втората средба на Заедничкиот интердисциплинарен комитет на експерти формиран во согласност со Договорот од Преспа, постигната е согласност за интензивирање на активностите. Наредниот состанок ќе се одржи на 12 и 13 април во Атина.

На почетокот на ноември во Солун беше одржана првата средба, на која двете страни го усвоија Деловникот за работа и се согласија за динамиката на идните состаноци.