Со новиот, значително построг антипушачки закон што го подготвува Владата, пушењето ќе биде целосно забрането во низа јавни и приватни простори, без исклучоци какви што постоеја досега. Законот има за цел целосна заштита на непушачите и унапредување на јавното здравје.

Според најавеното законско решение, пушењето нема да биде дозволено во сите затворени јавни простории, вклучително и:

Кафулиња, ресторани, барови и сите угостителски објекти, без разлика дали станува збор за посебни простории или простории со вентилација

• Ноќни клубови и дискотеки
• Хотели – во заедничките простории и собите
• Трговски центри и продавници
• Канцеларии и работни простории
• Образовни институции – училишта, факултети и студентски домови
• Здравствени установи
• Јавни институции и административни објекти
• Културни и спортски објекти

Дополнително, пушењето ќе биде забрането и во автомобилите, особено кога во возилото има деца, што претставува една од најстрогите мерки во новото законско решение.

Новите правила нема да важат само за класичните цигари. Забраната ќе се однесува и на:

• електронски цигари
• вапинг уреди
• тутунски и никотински производи без согорување

Овие производи ќе бидат третирани целосно исто како класичните цигари, што значи дека нивната употреба ќе биде забранета на сите места каде што не е дозволено пушење.

Законот предвидува и построги правила за продажба и изложување на цигари, со цел да се намали нивната видливост и достапност, особено кај младите.

Предлог-законот ќе биде ставен на јавна расправа, по што ќе следува собраниска процедура. Доколку биде усвоен, ќе стапи на сила по преоден период, за граѓаните и угостителите да имаат време да се прилагодат.

Од Владата велат дека целта на мерките не е казнување, туку создавање поздраво општество и заштита од штетните последици на пасивното пушење.