Македонија е повторно со снег.  Најголема снежна покривка и најстудено изутринава е во Маврово, со седум сантиметри снег , а температурата падна на  минус шест степени. Минус пет степени се измерени во Пожаране, – 4 во Крушево, -3 и во Дебар, Тополчани и Лазарополе, -2  во Берово, Куманово, Прилеп и Штип, а во Скопје – 1.

Изутринава времето е облачно и студено со повремени врнежи од снег, во јужните делови врнежите се претежно од дожд. Дува слаб до умерен ветер претежно од северен правец. Можна е изолирана појава на замрзнат дожд.

До крајот на денот ќе биде облачно и студено со повремени врнежи од снег, во јужните делови од дожд и снег.  На повеќе места врнежите ќе бидат пообилни и ќе наврнат над 15 литри на метар квадратен. Во поголем дел од државава ќе се формира снежна покривка, а на планините значително ќе се зголеми. Ќе дува слаб до умерен, а во западните делови повремено засилен ветер од северен правец.

Максималната температура денеска во земјава ќе достигне од 1 до 6 степени.Скопје, облачно со врнежи од снег и со слаб до умерен ветер од североисточен правец правец. Температурата ќе достигне до 2 степена.

Во петок се уште ќе има повремени врнежи од дожд и снег, но кон крајот на денот ќе престануваат. Во сабота ќе биде променливо облачно со провејување на слаб снег. Во сабота и во недела во утринските часови на повеќе места температурите ќе бидат под и околу нула, во интервал од минус четири до еден степен. Постепено затоплување ќе има од недела во текот на денот, кога ќе има локални врнежи претежно од дожд.