Бугарската потпретседателка Илијана Јотова, за „Бгнес“ изјави дека без оглед на промените, Бугарија мора да остане на цврстите позиции во однос на заклучоците на Консултативниот совет за национална безбедност кои беа усвоени од претседателот минатата есен, како и на рамковната позиција на владата и на декларацијата на Националното собрание.

„Не може да има компромис со нашата историја, особено кога има тврдења или потенцијални тврдења за иднината“, рече Јотова.

Таа вели дека е загрижена за тоа што се случува и дека за неа е чудно зошто ова прашање е покренато во последните неколку месеци.

„Пред само една година мислев дека сите клаузули запишани во Договорот за добрососедство ќе станат дел од европската рамка кога ќе започнат преговорите со РС Македонија. Имавме гаранции на разни форуми, не само од Советот на министри за надворешни работи и од Советот за општи работи. Во секој случај, веќе неколку месеци ова прашање е покренато во полна сила, како да немаме никакви прелиминарни договори досега. Нејасно ми е каде се прекина линијата и зошто почнаа да се прават тврдења од македонската држава за кои досега не сме чуле. Тие започнаа да ги оспоруваат текстовите на Договорот за соседство. Вистина е дека од самиот почеток договорот мораше да биде придружен со анекс, кој зборува категорично за нашето историско минато“, вели Јотова.

На овој клучен датум министрите за надворешни работи на земјите-членки на ЕУ ќе треба да одлучат со консензус дали ќе биде прифатена преговарачката рамка со која Македонија ќе треба да ги започне преговорите за прием.

Бугарските власти најавија дека ќе стават вето на преговорите.