За двете обвиненија СЈО има доволно докази, изјави вечерва специјалната обвинителка Катица Јанева во интервју за МТВ.

„За двете обвиненија за кои ме прашувате СЈО има доволно докази, поради што очекуваме судот да постапи согласно изнесените докази и дека по нив ќе одлучува согласно законот. Јавноста треба да биде убедена дека како поднесените обвиненија и другите ќе бидат засновани на факти и докази“ - рече Јанева во интервјуто на МТВ. 

Таа смета дека и во Кривичен и во другите судови има професионалци кои си ја вршат професионално работата. 

Од 11 март до 15 септември се преслушани 12% од материјалите и се надева дека во новите простории ќе работат побрзо. 

Таа вели дека сака да соработува со Собранието и со Советот на јавни обвинители, каде ќе треба да го образложи извештајот, заради СЈО, и за да се направат законски измени за заштитени сведоци. 

Јанева се надева дека Уставен суд ќе донесе одлука во корист на СЈО кога ќе се произнесува за уставноста. 

„Тоа е во интерес на граѓаните и во интерес на владеење на правото во Македонија“ - вели Јанева. 

Додаде дека спие мирно и дека сите во СЈО се свесни за одговорноста на работата која ја вршат.