Иако на патарините долж Коридорот 10 наскоро ќе се воведе електронски систем за наплата, ниту еден од вработените на наплатните рампи нема да остане без работа, уверува министерот за транспорт и врски Миле Јанакиески. „Напротив сите вработени ќе останат на работа и ќе бидат прераспределени на нови работни места“, вели Јанакиески. Работата на патарините по Коридорот 10 треба целосно да биде заменета со електронски апарати, со ситем на маркички и електронски билети, а за имплементација на проектот е задолжена турската компанија „Аселсан“. Проектот во целост треба да биде имплементиран во 2016 година и ќе чини 19 милиони евра, од кои 15 се обезбедени од Европската банка за обнова и развој. Властите очекуваат тој да го намали застојот на наплатните рампи.