Пуштен во употреба е санираниот пат од Штип до селото Љуботен, долг помалку од 2 километра. Црвената лента ја сечеше министерот за транспорт и врски, Миле Јанакиески. Друштво му правеше градоначалникот на Општина Штип, Илчо Захариев. Како што информирашњ Јанакиески, во земјава се градат шест регионални патни правци во исто време во источна Македонија, а меѓу позначајните е регионалниот пат Радовиш-Конче. „За наредниот период она што го истакнавме како приоритет за источна Македонија е изградба на автопатот Миладиновци-Штип, потоа реконструкција и проширување на патот Велес-Кадрифаково, а веќе се започнати градежните работи таму“, изјави Јанакиески. Санацијата на патот Штип - Љуботен чинеше 230.000 евра, а за изведбата на градежните работи беше задолжена фирмата „Гранит“. Како што појасни Јанакиески, сега се бараат пари и за патниот правец од Штип до Кочани а од 2015 година ќе се направат уште 150 локални патишта. Според А1он, санираниот пат од Штип до селото Љуботен, веќе беше еднаш пуштен во јули годинава, од страна на градоначалникот Захариев.