Поларниот експедициски брод m/v „Хондиус“, познат како еден од најеколошките и најнапредни бродови за истражување на Арктикот и Антарктикот, се најде во центарот на драматичен здравствен инцидент, откако на него се појави сомнителна епидемија на хантавирус.

Наместо научна и авантуристичка експедиција, патувањето се претвори во криза, откако починаа тројца патници – брачен пар од Холандија и државјанин на Германија. Според информации на епидемиолози од Светската здравствена организација, се претпоставува дека заразата се случила за време на една од екскурзиите во дивина.

Бродот моментално се наоѓа во состојба на највисок степен на тревога и плови во близина на Зеленортските Острови, чекајќи дозвола за евакуација на заболени патници и целосна дезинфекција на Канарските Острови.

Луксузна авантура за „длабок џеб“

„Хондиус“ нуди специјализирани експедициски патувања за луѓе во добра физичка кондиција, најчесто на возраст меѓу 45 и 65 години, кои се подготвени да платат висока цена за истражување на недопрената природа.

Цените се движат:

 од 7.800 до над 19.100 долари по лице за едукативни експедиции

 околу 19.600 долари за 13-дневни „Basecamp“ аранжмани

 до 16.500 долари за пакети со набљудување китови

 до 17.950 долари за екстремни активности како кампување, кајак и скијање на Антарктикот

Наука наместо класичен луксуз

Бродот, долг 107 метри, не нуди класични крстаречки содржини како казина или аква-паркови, туку е фокусиран на наука и истражување.

Патниците имаат пристап до:

 библиотека

 предавални со научници

 панорамски салони и бар

 мала амбуланта – која сега е клучна точка

Од луксуз до изолација

Луксузниот амбиент сега е заменет со строги здравствени мерки, изолација и маски. Првиот смртен случај бил 70-годишен Холанѓанец, кој починал на бродот, а неговото тело останало таму речиси две недели. Неговата сопруга починала по искрцувањето во Јужна Африка, додека третата жртва – германски државјанин – сè уште се наоѓа на бродот.

Во моментов има седум сомнителни случаи, вклучувајќи патник во тешка состојба и членови на екипажот со респираторни проблеми.

Компанијата активираше највисок степен на кризни мерки, додека патниците преку социјалните мрежи бараат помош, истакнувајќи дека неизвесноста е најтешкиот дел од ситуацијата.

Додека „Хондиус“ продолжува да плови, неговата модерна опрема сега има една цел – да спречи ширење на вирусот меѓу 170 патници и 61 член на екипажот.