Македонија ќе биде нова точка на светскиот атлас која Израелецот Хилел Ефлал ќе ја истражува во наредните недели, и тоа шетајќи со неговиот електричен велосипед.

- Јас сум слободен уметник и жител на светот, во вистинска смисла на зборот. Израелец сум, живеев одреден период во Америка, сега решив да ја запознавам Европа или конкретно Балканскиот Полуостров, а во вашата држава, Македонија за која многу сум слушал и читал, ќе престојувам две-три седмици. Ова е еден специфичен начин да го минам летниот одмор. Од Бугарија доаѓам преку Крива Паланка, прекрасно гратче кое ме воодушеви со природата и срдечноста на луѓето. Оттука преку Куманово ќе отседнам во Скопје, чиишто знаменитости мора да ги посетам, изјави Ефлал.