Во пожарот што ја зафати „Ковид“ болницата во Тетово загинаа најмалку десет лица, а изгоре дел од зградата.

Пожарот избувна синоќа околу 21 часот, а до 21.45 часот бил изгаснат од 30 пожарникари со седум возила.

„Зградата беше во пламен, а пожарот најверојатно започна однатре. Повредените граѓани беа евакуирани, а сѐ уште го немаме точниот број на загинати“, изјави началникот на противпожарната бригада Тетово, Сашо Трајчевски.

Повредените граѓани итно се пренесени од Тетово во Скопје за понатамошно лекување и утврдување на степенот на повредите.

Засега не се познати деталите за тоа како настанал пожарот, а повеќе детали за околностите на несреќата ќе бидат познати по истрагата.

Седница на Владата на Северна Македонија во врска со овој настан е закажана за 10:00 часот.

Владата и претседателот на Македонија, Стево Пендаровски, изразија сочувство до семејствата на жртвите на својот профил на Твитер.