Кандидатката за градоначалничка на општина Центар, Билјана Ивановска, нема да ја прифати понудата на Јавното обвинителство на Македонија да се појави на распит по завршувањето на локалните избори, туку ќе даде изјава уште утре, објави „Независен“.

Ивановска ќе се појави во обвинителството утре напладне за да даде изјава во врска со кривична пријава за која не знае ниту од кого е поднесена, ниту за што се однесува. Обвинителството, пак, не е сигурно дали пријавата има основа.

Таа доби покана за распит 11 часа по објавувањето на нејзината кандидатура, која ѝ беше доставена на домашна адреса преку полициски службеници. Според Обвинителството, кривичната пријава за која преземаат дејства е поднесена на 18 февруари годинава. По реакциите од јавноста, Ивановска доби можност да се јави по изборите, понуда што таа ја одби.

„Јас немам што да кријам, имам чиста совест и не се плашам од никакви закани, ниски удари или притисоци. Мојата цел е достоинствен живот во Центар, а нашата битка заедно со „Независни заедно“ е отпор против воспоставените антивредности на корупција и клиентелизам кои нè доведоа до оваа ситуација“, порача Ивановска.

Билјана Ивановска е поранешна претседателка на Државната комисија за спречување корупција и ревизор на ИПА фондови.