Откако ја одбил поканата од министерката за образование и наука, Мила Царовска, научникот Иван Грозданов објасни на Фејсбук зошто не сакал да оди на приемот. 

Поканети биле шест научници од Македонија кои се дел од 2 отсто најцитирани и највлијателни научници во светската наука за 2020 година (според анализите на колеги од универзитетот Стенфорд, САД).

„Таа констатација за мене и моите пет колеги не дојде од наши институции, туку од странски колеги/универзитет. Затоа, нашите политичари немаат морално право да си ловат партиско-политички поени за ова. Барем јас не се ставам во служба на ничие дневно-политичко саморекламирање.  Ниту една досегашна влада во Мaкедонија немала ни слух ни определба пристојно, континуирано и систематски да ја помага науката во нашата земја. Напротив, политичарите на многу начини ја одмагаат, па и ја згаснуваат. Важни им се само партиски профитабилни инвестирања. Во мојот случај, партиско-политичките попречувања одеа до таму што бев принуден и изработката и одбраната на мојата докторска дисертација да ги правам по туѓи земји – во еден вид политичко прогонство. Овде бев брутално спречен дури и да пријавам докторска дисертација, токму преку партиско-политичките структури и на универзитетот и многу пошироко. Само поради мојата аполитичност и христијански светоглед“, пишува Грозданов. 

Додава дека сите негови влијателни научни трудови се извршени во друга земја, со нивна логистичка и финансиска поддршка. 

„Овде ниту имав услови, ниту поддршка. Оттаму, не гледам зошто министерката за образование и наука би се гордеела, барем во мојот случај. Попрво треба срам да ја фати. Пред неколку месеци ѝ пишав на дотичната министерка во врска со некои образовни прашања – не бев удостоен ни со одговор. Како и нејзините претходници, бездруго и таа си рекла : „Кој е овој, да му одговарам! Не сум го видела на ниеден партиски собир!“ На лично ниво, не чувствувам никаква чест да одам на свечен прием кај министерка која во најчувствителната област на образование на нашите деца, програмата за образование по ткн. „Сестрано сексуално образование“ ја доверува на хомосексуално-лезбејски здруженија, чиј промотор е и самата министерка. Тоа е како да им довериш на проститутките да ги учат децата на морални вредности. Со заложба токму на оваа министерка, не само што се озаконија и истополови бракови, контроверзни родови идеологии, туку се работи на тоа, кај децата да се внесат искривени морални вредности за половите машко и женско, за бракот и семејството. Токму оваа министерка турка закони и образование во насока на уривање на јавниот општествен морал – нешто, што допрва ќе го почувствуваме“, пишува тој. 

Наведува дека чест му е што дури 4 од 6 научници во ова рангирање, се хемичари од ПМФ - Институт за хемија, Скопје, а двајцата најмлади биле и негови студенти. 

Љупчо Коцарев, Леонид Грчев, Валентин Мирчески, Рубин Гулабоски, Трајче Стафилов и Иван Грозданов се најдоа на листата на водечки 2 проценти од научниците во светот. Тие се споменуваат меѓу 100.000 најдобри научници со светот, а ценет е не само нивниот професионален труд и достигнување, туку и импактот на нивната работа и трудовите коишто ги имаат објавено.

фото Фејсбук