Спротивно на политичарите кои тврдат дека откако се на власт, граѓаните на нивната земја никогаш не живееле подобро, жителите на Западен Балкан ја оценуваат економската состојба како исклучително нестабилна и стравуваат дека ќе биде уште полоша. Србија бележи најголем раст на незадоволството во 2025 година и најрадикална промена на расположението за само една година во споредба со сите други земји во регионот. Меѓу населението на Западен Балкан, граѓаните на Србија имаат најмалку доверба во државните институции, се најнегативни во својата проценка дека благосостојбата на општеството е подредена на странски интереси и најмногу се плашат од граѓанска војна, според истражувањето „SecuriMeter 2025“ на Регионалниот советодавен совет (RCC), пренесува Бизнис и финансии.

Балканците најголема поддршка гледаат во семејството и пријателите, а најмалку им веруваат на политичарите. Додека пред пет години, една третина од жителите на Западен Балкан сметаа дека ситуацијата во нивната земја е релативно задоволителна, сега тоа го мислат помалку од една четвртина. Незадоволството од економската и социјалната состојба е најизразено во Босна и Херцеговина(БиХ) и Србија, според истражувањето „SecuriMeter 2025“ на Регионалниот советодавен совет (RCC).

РСК спроведе анкета во Албанија, Црна Гора, Северна Македонија, Босна и Херцеговина, Србија и Косово,  со цел да утврди како граѓаните ги оценуваат своите земји врз основа на неколку клучни и меѓусебно поврзани фактори: дали се чувствува економски напредок, каква е довербата во институциите, колку е распространета корупцијата, каква е личната безбедност, колку е способно општеството да се спротивстави на негативните надворешни влијанија и да избегне внатрешни конфликти.

Испитаниците во целиот регион се најзагрижени поради огромното зголемување на трошоците за живот и растот на инфлацијата. Жителите на Западен Балкан се незадоволни од нивото на платите и пензиите, веруваат дека даночниот товар во нивните земји е превисок и се плашат од губење на работата поради честото затворање на компаниите и намалените шанси за наоѓање нова работа.

Забележливо е дека во последните пет години, проценките за перспективите на домашната економија значително се влошија. Во моментов, над 45 отсто од жителите во регионот веруваат дека „работите одат во лоша насока“, помалку од една четвртина веруваат дека домашната економија ќе расте, додека останатите се неодлучни.

Албанија и Македонија малку отстапуваат од вкупните резултати, каде што во 2025 година оптимизмот е малку зголемен во споредба со претходните години. Сосема спротивен тренд се забележува во Црна Гора. По политичката промена на парламентарните избори во 2021 година, 62 отсто од црногорските граѓани верувале дека домашната економија има добри перспективи за развој, додека во 2025 година само 27 отсто од анкетираните биле целосно или делумно убедени во ова.

Песимизмот е најизразен во Босна и Херцеговина(БиХ), каде што речиси 60 отсто од жителите не веруваат во стабилизирање на економските услови, а таквото расположение е континуирано присутно во текот на последните пет години. Перцепцијата на јавноста во Србија за состојбата на домашната економија значително се влошува од 2023 година, а минатата година повеќе од 52 отсто од анкетираните ја оцениле ситуацијата како исклучително лоша. Србија бележи најголем раст на незадоволството во 2025 година и најрадикална промена на расположението за само една година во споредба со сите други земји во регионот, истакнува истражувањето.

Кога станува збор за Косово, индикативно е што во споредба со 2021 година, економскиот оптимизам се зголемил повеќе од трипати во 2022 година, кога 48 отсто од граѓаните верувале во економско подобрување, но минатата година само 29 отсто од испитаниците го имале ова мислење.