Откако на поранешниот вицепремиер Артан Груби му беше продолжен минатиот месец домашниот притвор со 24-часовна полициска заштита, јавноста сè уште нема информации за тоа како се води неговиот случај. Основното јавно обвинителство, кое е надлежно за истрагата, не дава информации.

„Во врска со овој случај, во оваа фаза од постапката не сме во можност да споделиме детали за преземените дејствија“, соопшти Обвинителството за Алсат ТВ.

Адвокатот на Груби не беше достапен, додека Обвинителството не сподели информации за тоа дали Груби дал изјава пред обвинителот и дали неговата одбрана имала пристап до доказите од случаите.

„Обвинителството има обврска да се грижи за заштитата на постапката во секој случај посебно“  одговори Обвинителството.

По повеќе од 14 месеци бегство, Груби беше предаден на властите на граничниот премин Блаце на 23 февруари. Сепак, наместо ефективен притвор поради безбедносни ризици, обвинителството побара, а судот му одреди куќен притвор. 

Груби е осомничен, заедно со поранешниот директор на Државната лотарија, Перпарим Бајрами, дека учествувале во проневера на околу осум милиони евра преку набавка на VLT автомати. Во 2024 година, Груби беше ставен на црната листа на САД поради неговата вмешаност во корупција поврзана со случајот Таргет.