Обвинетиот Игор Југ во своите завршни зборови на денешното рочиште за „крвавиот четврток“ рече дека политичките елити што беа директни и индиректни творци на 27 април се осмелија да одредуваат за вината на обвинетите во случајот. 

„Во протестите ме нервираше една работа, а тоа е – оние што најмногу повикуваа на протести, ниту еднаш не излегоа. Ние ги избиравме за да нè водат, а не да се кријат зад нас. Но, по сè изгледа, не беше така. За да си ги спасат своите задници и банкарски сметки, наместија невини луѓе да спијат во затвор, а оние што ги отворија вратите добија амнестија за да не кажат кој им рече да го сторат тоа. Покрај отворачите на портите, во амнестијата се протнаа и ликовите од Готам сити, предводниците на револуцијата, која дебело ја наплатија“, рече Југ.

Вели дека во Собранието не сторил никакво кривично дело, но со изгледот и гардеробата направил бум.

Југ рече дека неговиот физички изглед бил пресуден да се најде помеѓу обвинетите, ќелав, тетовиран, висок и со над 100 килограми, а дополнителен фактор била маицата ХОС, која ја носел.

Југ потенцира дека немал задача да го убие премиерот Зоран Заев, а доколку сакал да го стори тоа, можел да го направи без проблем.

„Кој калибар сум јас за да ми дадат задача да го убијам премиерот? Имам шеќер од кој ми е расипан видот. За ладнокрвно убиство треба способен човек и професионалец“, рече Југ.

На денешното рочиште завршен збор дадоа разузнавачот Мунир Пепиќ, Јане Ченто, Игор Дурловски, Горанчо Анѓеловски-Ќосето и Игор Југ.