Русија ја признава Македонија под новото официјално име Република Северна Македонија. Ова станува јасно по соопштението од руското МНР.

Официјална Москва ја призна Република Северна Македонија и покрај резервите кои Русија претходно ги изразуваше по прашањето на легитимитет на промената на името.

-Руската Федерација ја признава оваа земја под новото име Република Северна Македонија-стои во соопштението.

Македонскиот парламент едногласно на 11 јануари ја усвои уставната промена со која земјава, согласно со Преспанскиот договор, го промени името во Република Северна Македонија и така стави точка на повеќегодишниот спор кој го имала со Грција во врска со своето име.

Русија имаше Коментар веднаш по усвоените амандмани

„Позицијата на Руската федерација за проблемот со македонското именување на државата останува непроменета – стабилно решение треба да се најде без надворешен притисок, наметнувањето на рокови и услови од надвор, со потпирање на широка општествена поддршка, како во Република Македонија, така и во Грција и исклучително во рамките на правното поле. Поаѓаме од тоа што даденото прашање треба да се разгледа во СБ на ОН во согласност со членот 3 од резолуцијата на СБ број 845“.

По реакција од Атина на руските коментари, се јави заменикот министер Александар Грушко со изјава дека „Ние не се мешаме во внатрешните работи на Грција, но во тие прашања кои влегуваат во компетенции на СБ на ОН, Русија ќе ја кажува својата точка на гледање“. Според него оценките во коментарот на руското МНР се принципиелни  и се поврзани со целата историја  за тоа како течеа преговорите, под каков меѓународен притисок, на мешањето без преседан од страна на Запад за постигнување на целосно геополитички цели.