На 1 септември на Градскиот плоштад во Скопје, по повод одбележувањето на 35-годишнината од независноста на Македонија, ќе се одржи голем концерт со настапи на светски познати и домашни музички ѕвезди. Главната ѕвезда на вечерта ќе биде шпанскиот тенор Хозе Карерас, кој ќе настапи заедно со составот Македонија Олл Стар, вклучувајќи ги Каролина Гочева, Влатко Стефановски, Калиопи, Наум Петрески, Сузана Спасовска, како и Игор и Ана Дурловски.

Овој настан е втор во рамките на одбележувањето на 35 години независност, по настапот на Давид Гета и Монолит шоу на 8 септември на Градскиот стадион.

Владината портпаролка, Марија Митева, истакна дека подготвувањето на прославата е насочено кон создавање достојна прослава за граѓаните.

– Сакаме граѓаните да уживаат и да покажеме дека можеме да организираме настан со македонски и светски музички ѕвезди – рече Митева, нагласувајќи дека дополнителни настани ќе бидат објавени подоцна.

Бобан Милошески од „Авалон Продукција“ најави дека концертот ќе претставува спој на македонската музика со светската класика.

– Сакавме да споиме нешто светско со нашата македонска музика. Настанот ќе биде исполнет со изненадувања, а екипата на Македонија Олл Стар е внимателно избрана – истакна Милошески.

Настанот ќе биде поддржан од Македонската филхармонија, а аранжманот на песните ќе го реализира Николче Мицевски, кој најави симфониски пристап за збогатување на настапите. Директорот на Филхармонијата, Мустафа Имери, изрази чест што оркестарот ќе ја отвори прославата.

Овој настан ветува незаборавна вечер за сите љубители на музиката и културата, со уникатен спој на домашни и светски музички имиња.