Струмичкото јавно претпријатие за комунални дејности Комуналец почна со поставувањето на нов таложник на реката Воденичица од каде жителите на селото Банско и хотелските комплекси се снабдуваат со вода за пиење. Како што информираат од Комуналец, таложникот кој е со должина од 20 метри, ширина 3 и висина од 2 метри ќе овозможи висок степен на таложување и квалитетен дотур на вода во наредните 20 години. “Оваа инвестиција вреди 2 милиони и 900 илјади денари, инвеститор е општина Струмица во реализација со јавното претпријатие Комуналец, а изведувач на работите е фирмата Габро од Струмица. Теренот каде што се прави таложникот е доста тежок и комплициран за работа, но сепак се надевам дека ако не послужат и временските услови во наредните триесетина работни денови ќе го завршиме овој зафат. Со ова ќе бидат надминати сите проблеми со водоснабдувањето и жителите и хотелските комплекси ќе добијат квалитетна вода за пиење“, изјави Зоран Ѓоргиев директор на ЈПКД „Комуналец“. Во населеното место Банско има околу 500 домаќинства со над две илјади жители.