Скопје минатата ноќ се соочи со ретко видени сцени на аеродромот – повеќекратни прекини на слетување, авиони кои кружат со часови и екипажи што носат секундарни одлуки под притисок на опасни временски услови. Причината е еден од најстрашните феномени во авијацијата: „wind shear“ – ненадејна промена на ветерот што може да го дестабилизира авионот во миг.

Според првичните информации, најмалку два лета – од Истанбул и од Венеција – не успеале да воспостават стабилен приод кон скопскиот аеродром. И покрај повеќекратните обиди, силниот и непредвидлив ветер ги принудил екипажите да се пренасочат кон Приштина.

Особено ризична била ситуацијата со летот од Венеција. Патниците повеќе од еден час го следеле кружeњето над Скопје, надевајќи се на смирување на условите. Но „wind shear“ упорно го нарушувал воздухот над пистата, па пилотите морале да ја донесат единствената безбедна одлука – пренасочување.

И утрово хаосот продолжи: летовите од Ларнака и Истанбул кружеле повеќепати околу аеродромот, а доцнењата достигнале над 30 минути.

„Wind shear“ претставува една од најголемите опасности при слетување – нагли промени на брзината или насоката на ветерот може да предизвикаат губење висина, нестабилност и изместување од траекторијата. Феноменот често се јавува кај невреме, атмосферски фронтови и микропоројни спуштања на воздух.

Аеродромските служби се во зголемена будност и ја следат состојбата преку специјализирани системи, а патниците треба да бидат подготвени за можни доцнења, откажувања и пренасочувања и во следните часови.