Гувернерот на Народна банка, Трајко Славески, на денешната средба со директорите на деловните банки во Македонската банкарска асоцијација им порача да ги намалат цените, односно провизиите на платежните услуги.

По средбата гуцернерот рече дека овие приходи им носат дури 18 отсто од приходите на домашните банки и доколку поевтинат тоа ќе значи охрабрување за граѓаните помасовно да ги користат, а со тоа и ќе се намали сивата економија.

- Високите трошоци за извршување на плаќања можат да бидат бариера за користење на официјалните канали, особено кај населението со пониски примања кое во услови на ценовно недостапни услуги ќе мора да се потпира повеќе на готовина. Надоместоците за платежни услуги треба да бидат на разумно ниво - рече Славевски.

Тој порача дека треба да поевтинат надоместоците за одржување на платежна сметка за компаниите, за користење на електронско и мобилно банкарство, за плаќање платни налози во рамки на банката, меѓубанкарските плаќања во домашна валута, подигнувањето готовина на туѓи банкомаѕи, како и плаќањето со картички на продажни места кај трговците.

Славевски порача дека простор ќе се остави до есен за дискусија, по што ќе бидат донесени потребните подзаконски и законски акти доколку не се исполнат барањата.  Но додаде дека секоја банка треба самостојно да ги промени ценовниците за да нема сомнежи во можно монополско договарање.

Претседателката на банкарската асоцијација Маја Стевкова - Штериева рече дека секоја банка си има свои трошоци за одржување на платежниот систем, покрај приходите што ги наплаќа.

А.К.