„Ниту сум организирал, ниту сум дал согласност некој да организира насилен упад во Парламентот и физичка пресметка со пратеници. Напротив, прв од сите политичари веднаш штом дознав побарав смирување на состојбата преку социјалните мрежи бидејќи тој и претходниот ден бев на пат во Виена“ - пишува на социјалната мрежа Фејсбук екс премиерот во бегство Никола Груевски откако Основното јавно обвинителство за гонење на организиран криминал и корупција соопшти дека повело постапка против петмина осомничени за случувањата во Собранието на 27 април , меѓу кои е и тој.

„Политичкиот прогон против мене и против многумина од ВМРО-ДПМНЕ продолжува. Малку им е обвинението и незаконската политички нарачана казна затвор дека сум влијаел да се набави блиндирана кола бидејќи сум сакал да бидам награден со тоа што и јас како премиер понекогаш ќе сум бил превезуван во неа покрај странските гости. Малку им е апсурдното обвинение дека сум барал автопатот Кичево-Охрид да се заврши побрзо наместо побавно оти сум сакал граѓаните да ме наградат со тоа што ќе гласаат за мене на следните избори.

Малку им е обвинението дека наводно сум нарачал шамари кои никогаш никому не биле удрени“, додава Груевски.