Eкс премиерот Никола Груевски реагира на денешното сведочење на Александар Ивановски-Алек Теранова во случајот „Плацеви на Водно“, и вели дека не терал никого да купува нешто за него. 

Тој е во Унгарија каде доби политички азил, и на Фејсбук реагираше за денешното сведочење. 

„Во врска со земјиштето на Водно за кое незаконски сум обвинет и без елементарен доказ, Александар Ивановски потврдил дека со мене немал никаков контакт, но дека во некоја подоцнежна фаза претпоставувал дека станува збор за мое земјиште, па дури и дека лицето кое побарало да посредува со продавачите наводно тоа му го признало во еден момент, но дознав и тоа дека тоа посочено лице од Александар Ивановски подоцна во текот на рочиштето го негирало тоа“, напиша Груевски на Фејсбук.

Тој воедно додава дека имало многу контрадикторни сведочења на Ивановски за ситуации каде, посочува Груевски, воопшто не учествувал.

 Според сведочењето, Груевски, преку унгарски број му се јавувал на бизнисменот Алек Теранова и кај него барал стан во Центар во кој би живееле неговата сопруга и децата. 

Питер Марки-Заи, кандидат за нов претседател на унгарската влада избран од здружената опозиција, најави екстрадиција на поранешниот македонски премиер Никола Груевски во Македонија доколку победи на пролетните парламентарни избори во Унгарија.