Грчките медиуми будно ја следеа посетата на шефот на ЕК Жан Клод Јункер на Македонија, ставајќи акцент на неговата порака дека е потребно да се реши прашањето за името. Но и за тоа дека по пристигнувањето во Скопје, Јункер забележал промени во позитивна насока. „Јункер до Заев: Вашата земја е дел од европската историја“, „Јункер: Не дојдов во Скопје за да соопштам конечен датум за интеграција“, „Јункер: Продолжете и решето го прашањето за името“, „Не дојдов овде за да соопштам конечен датум за интеграција, потенцираше Жан Клод Јункер од Скопје“, се дел од насловите во грчките медиуми.

– Жан Клод Јункер му потенцираше на Зоран Заев дека треба да се реши проблемот со името, а не испушти да го коментира преименувањето на меѓународниот аеродром на соседната земја - пишува „Real.gr“.

Весникот „То Вима“ наведува дека Јункер е импресиониран од напредокот во реформите што се направени во соседната земја и оти ја потенцираше потребата да продолжи на овој пат и да го реши прашањето со името со Грција.

– Користејќи внимателни изрази и без ниту еднаш да го спомене зборот Македонија, Жан Клод Јункер на заедничката прес-конференцијата со скопскиот премиер, даде надежи за почеток на интегративниот процес, но поставувајќи го како предуслов решението на името, но и други реформи - оценува грчката делевизија Алфа.

Според Алфа, турнејата на Јункер е за да ги охрабри земјите од Западен Балкан на нивниот долг пат до интеграција, но и за да ја направи појасна намерата на ЕУ да игра главна улога на Балканот.