Oбвинителството во Грција смета дека некој во Грција се обидува да создаде македонско малцинство. 

На 2 февруари е закажано рочиштето на Окружниот суд по регистрацијата на Основниот суд во Лерин (од 27 јули 2022) на здружението Центар за македонски јазик во Грција. Окружната обвинителка Анастасија Калаици смета дека со регистрацијата на едно вакво здружение, чија цел е „зачувување и негување на македонскиот јазик во Грција“ и „воведување на македонскиот јазик како изборен предмет во јавните училишта и универзитети во Грција“, се прекршува Договорот од Преспа и е обид за создавање малцинство, пишува Катимерини.

Според обвинителката, македонскиот јазик е признат само како „јазик на граѓаните на Република Северна Македонија. Дефиницијата на јазикот ‘македонски’, споменат во Договорот од Преспа, има само описна сличност со географскиот регион Македонија, кој е единствен и составен дел на Република Грција и на никаков начин не е поврзан со него, како словенечки јазичен идиом, кој, според некои, се зборувал во географските граници на македонскиот регион на Република Грција... Во Грција нема ‘македонски’ граѓани кои го зборуваат овој јазик, туку грчки државјани кои зборуваат грчки јазик. Очигледно е дека целите на регистрираното здружение воопшто не се јасни. Се создава погрешна слика и впечаток дека регистрираното здружение можеби сака да промовира друг јазичен идиом, што се вика македонски јазик, кој не постои во Грција...“. Ова е обид да се создаде малцинство во Грција, пишува грчката обвинителка во своето образложение за покренатата тужба.

Павле Васкопулос Филипов од партијата на Македонците во Грција „Виножито“ како позитивна ја оцени регистрацијата на Центарот за македонски јазик во Лерин, но според него времето ќе покаже во која насока ќе се движи јазичното прашање.

фото Катимерини