Заштедите на македонските граѓани од месец во месец се поголеми. Најновите податоци на Народната банка на Македонија покажуваат дека вкупно во банките граѓаните депонирале над 6,9 милијарди евра или скоро 7 милијарди евра, а растот на годишно ниво кај депозитите на населението е високи 14 проценти.

Бројките кои ги објави НБРСМ покажуваат дека вкупните депозити, односно парите кои граѓаните и компаниите ги чуваат во банките достигнува до 10,3 милијарди евра.

Ова значи дека компаниите во банките чуваат многу помалку пари отколку граѓаните. Грубо нивните заштеди достигнуваат околу 3 милијарди евра

Народна банка објави дека во октомври е регистиран годишен раст на вкупните депозити од 11,8 проценти, како и на вкупните кредити за 12,1 процент.

- Порастот на вкупните депозити, пред се, се должи на растот на депозитите кај домаќинствата, а растот кај кредитите произлегува од зголемените кредити на корпоративниот сектор.

Физичките лица најмногу земале потрошувачки и станбени кредити и кај нив е забележан годишен раст соодветно од 10,2 проценти и 16,1 проценти - се посочува во соопштението на Народна банка на Македонија. 

Од таму додаваат дека кај автомобилските кредити се бележи намалување на годишно ниво од 1,9 проценти.

Пад на годишно ниво бележат и кредитите одобрени на кредитни картички.

Бројките пак откриваат дека населението за кредити должи 4,4 милијарди евра, додека пак компаниите 4,2 милијарди евра. Или вкупно граѓаните и компаниите кон банките имаат долг од 8,7 милијарди евра.

За споредба во првиот месец од годинава, или во јануари вкупната вредност на кредитите достигнуваше 8 милијарди евра.