Градоначалникот на Дојран: Срамота за Силвана Бонева, ова време секогаш има исфрлена риба на брегот
Градоначалникот на Дојран, Анго Ангов, ја обвини поранешната пратеничка и функционерка на ВМРО-ДПМНЕ, Силвана Бонева. за намерно нанесување на штета на туристичкото место со, како што вели во својот демант, ширење на лажни вести.
Бонева со коментар „Риба исфрлена на брегот и останата без вода“ објави фотографии кои брзо се раширија на социјалните мрежи, а на истите беа прикажани голем број на риби угинати на брегот на Дојранското езеро. Ангов во демантот вели дека општопознато за ова време од годината е тоа што рибите поради мрестењето знаат да бидат исфрлени на брегот од езерото.
„Чувствувам потреба, како Градоначалник да одговорам на невкусните и злонамерни невистини, кои овие денови се шират како лавина низ социјалните мрежи, а се однесуваат на рибите и нивото на водата во нашето езеро.
Токму пред почетокот на летната туристичка сезона, политичките опоненти во нивен стил, пробуваат да го оцрнат имиџот на Дојран, при тоа пласирајќи невистини и дезинформации, а се со цел добивање евтини политички поени и нанесување невидена штета на угостителите, туристичките работници, како и на сите жители од нашата општина и луѓе кои навистина го сакаат Дојран.
Она што е најфрапантно во целата ситуација е што овие дегутантни шпекулации доаѓаат од личност која потекнува токму од југоистокот.
И наместо истата да работи во интерес на регионот од каде што потекнува, да го промовира Дојран, да понуди соработка, идеи и проекти кои би донеле добро на сите луѓе од овој крај, некогашната пратеничка одбира да шири паника, револт и страв кај народот. Овој пат тоа нема да го дозволиме!
Дојранското Езеро се наоѓа на задоволително ниво, односно котата изнесува 1 метар над нулта кота.Од друга страна, доколку таа навистина го познава и сака Дојран, ќе е информирана и ќе знае дека рибата во овој период од годината се мрести и таквиот приказ, (односно фотографиите кои таа ги приложила) не е невообичаена појава. Тоа добро го знаат сите Дојранчани, а особено старите и искусни рибари.
Почитувани сограѓани, ве молам да не потпаѓате под влијание на евтината пропаганда пласирана за Дојран на дел од групите на социјалните мрежи, за кои замолувам и апелирам до админите на овие групи, пред да дозволат било какви шпекулации да бидат јавно објавени, истите претходно да бидат проверени“, вели Ангов во демантот.
Слично
Поврзани вести
