Бобан Црничиќ е новиот в.д. директор на јавното претпријатие „Улици и патишта“. Назначувањето го направил градоначалникот на Град Скопје, Петре Шилегов кој завчера го разреши досегашниот директор Сенад Смаиловиќ. 

Како што информирале од Градот, новиот в.д. директор Бобан Црничиќ досега бил деловен асистент на Смаиловиќ.

Смаиловиќ бил приведен во полициска станица и по целосно документирање на случајот против него ќе биде поднесен соодветен поднесок.

Петре Шилегов, градоначалникот на Скопје, објави дека го разрешил Сенад Смаиловиќ, откако директорот на јавното претпријатие, според тоа што претходно го објави „Лидер“ , бил фатен со кокаин од полицијата во Струга.

Шилегов сепак, вчера, не ја наведе причината поради која го разрешува директорот, кој во јавноста беше познат под името Сенко.

„Дозволете ми да ја известам јавноста дека досегашниот директор на ЈП Улици и патишта - Скопје денес е разрешен од досегашната фунција“, напиша кратко Шилегов на својот профил на Фејсбук.

Тој бил приведен во полициска станица и по целосно документирање на случајот против него ќе биде поднесен соодветен поднесок – стои во билтенот на МВР.