Од Град Скопје велат дека е добро што министерот за локална самоуправа  Златко Перински во вечерашното интервју признал дека на средбата во Владата бил понуден план за санирање на состојбите во градот Скопје, а добро е и што признал дека градот е ликвиден, консолидиран и има сопствен финансиски капацитет да набави нови еколошки автобуси.

„Со ова паѓаат сите лаги кои во последниве две години ги пласираше ВМРО-ДПМНЕ. Ја поздравуваме искреноста на Златко Перински и повторуваме дека е точно дека градот Скопје може сам да набави 250 еколошки автобуси. За тој проект како министер за локална самоуправа сепак Перински би требало да знае дека набавката мора да биде изгласана и одобрена од Советот на град Скопје каде мнозинство има токму ВМРО-ДПМНЕ и нивната коалиција. Токму нивните советници 22 месеци гласаат против одлуката за набавка на нови автобуси. Доколку Перински смета дека може да апелира до советниците да гласаат за оваа одлука, подготвени сме да закажеме вонредна седница на Советот со цел изгласување на одлуката за набавка на нови еколошки автобуси“, стои во соопштението на Град Скопје.

Премиерот Христијан Мицкоски изјави дека да се гласа за земање кредит, за набавка на автобуси кои ќе стигнат догодина не е решение.  Во август имаше средба во Владата со скопската градоначалничка Данела Арсовска за да се најде решение за превозот, но договор не беше постигнат.