Инвеститорите покажале голем интерес за градежните парцели во новата населба во Општина Илинден, соопштуваат од општината. Оттаму информираат дека интензивно се работи на изградба на инфраструктурата за новата населба за домување на локалитетот Јака, во Марино. Во тек е изградба на мост и локален пат што треба да ја поврзе новата населба што ќе се простира на површина од 28 хектари, а опфаќа 500 парцели за изградба на семејни куќи, трговски центар, хотелско сместувачки капацитети, забавен парк, спортски терени и простор за собири. Досега за продажба се понудени 54 парцели за домување и една парцела за изградба на хотелски комплекс, а првото електронско јавно наддавање за парцелите од новата населба ќе се одржи на 12-ти ноември годинава.