Главните функционери на ЕУ во писмо испратено попладнево до националните влади на земјите членки на ЕУ бараат отворање на пристапните преговори за членство со Северна Македонија и Албанија.

Писмото е потпишано од актуелниот претседател на Европскиот Совет, Доналд Туск, новоименуваната претседателка на Европската Комисија, Урсула фон дер Лејн, и сегашниот претседател на Европскиот Парламент, Давид Сасоли, 

- Европската Унија стои пред стратешки избор. Одлуката за почеток на преговори со Северна Македонија и Албанија е тест за способноста на Унијата да ги испорача своите ветувања и да гледа кон иднината, пишуваат тројцата европски челници.

Таму се додава дека се работи за интерес на ЕУ и дека е потребно да се превземе следен чекор кон земјите „кои ги исполниле критериумите за отпочнување на преговарачкиот процес“.

-Северна Македонија и Албанија го направија тоа што го побаравме од нив. Исполнувањето бараше значаен напор од нивните граѓани за кои европската перспектива е голем извор на мотивација и одлучност. Веруваме дека сега е време да се отворат пристапните преговори со двете земји, стои во писмото, пишува лидерската тројка.