723 лица заболени од Ковид-19 и во самоизолација денеска гласале. 

Претседателот на ДИК, Оливер Дерковски, изјави дека е утврдено дека треба да гласаат 759 лица.

„Разликата што се јавува во бројките што ги соопштивме претходно е од причина што одлучувавме и прифативме одредени приговори од граѓани“, појасни Дерковски.

Додаде дека гласачките места во следните денови ќе бидат безбедни и ги повика сите граѓани да излезат и да гласаат. 

Од ДИК образложија дека ливчињата од гласањето денеска и утре остануваат запечатени во пликоата што се наоѓаат во гласачките кутии. 

Велат дека не постои начин да се отворат овие ливчиња и да се провери кој за кого гласал до завршувањето на изборниот процес.

Болните и немоќните ќе гласаат утре, но и лицата во казнено-поправните установи.

Право на глас на изборите имаат нешто повеќе од 1.8 милиони гласачи.