Поранешната пратеничка Ѓулистана Марковска вечерва во интервју за ТВ 24 изјави дека за неа обидот за пронаоѓање на екс премиерот Никола Груевски, не е спектакл, но очекува затоа што 11 години беше премиер, сам да се пријави. 

Таа очекува дека правната држава ќе профункционира и дека законот ќе важи за сите, во случајот и за граѓанинот Никола Груевски. 

„Бидејќи тој човек беше премиер на оваа држава 11 години, и сега е пратеник, во име на сè она што тој направи и сè она што не направи, очекувам да се пријави сам и да заврши оваа агонија“, рече таа. 

Претседателот на Достоинство, Стојанче Ангелов вели дека не станува збор за спектакл, и дека денеска новинарите не биле координирани, туку се работи за апсење на лице кое било на функција. 

„Тие не отидоа да ја скршат вратата и да фрлат шок бомби“, рече Ангелов. 

Ангелов очекувал дека илјадници граѓани ќе тргнат кон неговиот дом, да го заштитат, но тоа не се случи.