Пратеничката од СДСМ, Милева Ѓоргиева,  денеска на расправата во Собранието за ребалансот на буџетот рече дека опозицијата „ја болат успесите на новата реформска Влада“.

Таа на колегите од ВМРО-ДПМНЕ им порача да не ја замајуваат јавноста со депонијата во Струга за која веќе се издвоени средства за решавање на проблемот. 

„Пожарите постоеле и ќе постојат, надлежните го решаваат проблемот и ситуацијата е под контрола. Зарем заборавате на тоа што Дирекцијата за заштита и спасување изминатите години потрошила 13 милиони евра“ – изјави Ѓоргиева.

За задолжувањето вели дека новата Влада мора да ги враќа долговите на претходната. 

Ѓоргиева кажа дека за изградбата на автопатиштата се проневерени 140 милиони евра и во време на владеење на ВМРО-ДПМНЕ изградени се само седум километри автопат.

Претходно, пратеникот од ВМРО-ДПМНЕ, Драган Цуклев кажа дека целта е да се задоволат две основни популистички ветувања на СДСМ, а тоа се укинување на радиодифузната такса и обезбедување на средства за минимална плата.

За задолжителната минимална плата од 12.000 денари, пратеникот смета дека ќе направи дискриминација помеѓу стопанските субјекти и вработените.

Цуклев  ја обвини власта дека не се грижи доволно за земјоделците, но и за луѓето кои деновиве се соочуваат со пожари. 

Четврти ден се расправа за ребалансот на буџетот.