Адвокатот Даниел Георгиевски на денешната судска седница за случајот „Пулс“ нагласи дека обвинението против поранешниот министер за економија Ваљон Сарачини од 2012 година е правно, фактички и логички неосновано.

„Почитувани судии, почитуван јавен обвинител, почитувано мислење и почитувани медиуми, дозволете ми во име на одбраната да изразам најдлабоко сочувство до семејствата на починатите. Тука сме затоа што веруваме во судот и правдата и чувствуваме должност да ја презентираме вистината“, рече Георгиевски.

Тој подвлече дека клучното прашање е зошто се бара одговорност за поранешниот министер, кога во 2012 година воопшто не е издадена лиценца за објектот каде што се случи пожарот во 2025 година.

„Во 2012 година, Министерството за економија издаде лиценца за вршење гастрономска дејност – кабаре – на сосема друга локација, на улицата „Димитар Влахов“ во Кочани. Зградата каде што се случи трагедијата во 2025 година се наоѓа на улицата „Крижевска“, додаде Георгиевски.