Цените на нафтата Брент паднаа под 84 долари за барел откако пораснаа во среда, додека американската сурова нафта (WTI) се тргуваше под 79 долари за барел.

Цените сепак остануваат високи поради ескалацијата на конфликтот на Блискиот Исток и загриженоста за глобалното снабдување, објави Trading Economics.

Пазарот реагираше по новиот бран американски воени напади врз Иран и повторното воведување поморска блокада на иранските пристаништа во близина на Ормускиот теснец, еден од најважните светски транспортни правци за нафта.

Американските сили спроведоа операција што траеше неколку часа, за време на која беа погодени десетици воени цели по должината на иранскиот брег и во близина на стратешки важниот Ормуски теснец, со цел да се ослабне способноста на Техеран да го наруши меѓународниот поморски сообраќај.

Претседателот на Соединетите Американски Држави, Доналд Трамп, изјави дека воените операции ќе продолжат сè додека Иран не ги запре нападите врз бродовите во Ормускиот теснец и не им дозволи на бродовите да минуваат низ стратешкиот воден пат.

Во исто време, Трамп во вторник се откажа од претходно најавеното воведување на такса од 20 проценти за товар што минува низ Ормутскиот теснец, проценувајќи дека секоја загуба на приходи ќе биде компензирана со идни инвестиции од земјите од Заливот во американската економија.

Дополнителна поддршка за цените дадоа податоците од американската Администрација за енергетски информации (EIA), според кои залихите на сурова нафта во САД се намалени за 1,7 милиони барели минатата недела, што укажува на континуирана силна побарувачка на најголемиот светски пазар на нафта.