Во близина на крстот на Водно ќе се издигне телекомуникацискатa кула со футуристички изглед. Во неа треба да се сместат предавателите на македонските оператори и антенскиот систем за контрола и следење на радиофреквенциите. Планот е кулата висока 155 метри, да се направи половина километар источно од Милениумскиот крст, а ќе ја гради градежната компанија Гранит. Идејата е во објектот да се изгради ротирачки ресторан како и административни простории за Агенцијата за електронски комуникации (АЕК) и за Министерството за внатрешни работи (МВР). Компанијата Гранит преку Македонската берза извести дека кулата ќе биде готова за 5 години и ќе чини 17,6 милиони евра. Како што јави порталот Плусинфо кој ја објави и фотографијата,  наскоро ќе биде изработена и 3Д анимација на која ќе може да се види кулата од различни перспективи и од сите можни агли.