Од НАТО потсетуваат со кое име земјава влезе во Алијансата, откако претседателката Гордана Силјановска Давкова на инаугурацијата ја испушти придавката „Северна“.

„Северна Македонија во НАТО влезе под уставното име и тоа е името под кое се претставува“, рекол за грчката новинска агенција АНА-МПА функционер од Северноатлантската алијанса во однос на употребата на името Македонија од претседателката Силјановска Давкова, јави дописничката на МИА од Атина.

Функционерот, кој не е именуван, за АНА-МПА додал дека нашата земја е важен НАТО сојузник и „значајно придонесува за нашата колективна безбедност“.

Како пример ги споменал војниците распоредени во мисијата КФОР на Косово, мисиите во Ирак, како и мултинационалните борбени групи на НАТО во Летонија, Бугарија и Романија. Грција реагираше откако Давкова ја испушти придавката „Северна“ и повикаа земјава да го почитува Договорот од Преспа со кој се реши спорот за името.