Дожделивото и ветровито време не ги спречи граѓаните денеска напладне да излезат на протест пред Влада.

Револтирани од немаштијата и беспарицата кои ги делат од најблиските, десетици граѓани дојдоа пред Влада и ја изразија својата болка што токму нивните блиски се заминати во странство во потрага по подобар живот.

Тие со себе ги носеа обувките на своите најмили.

Во повикот кој беше организиран на социјалната мрежа Фејсбук пишуваше дека перформансот се организира поради се поголемиот број на млади кои заминуваат .

„Веќе со години сме сведоци и жртви на најголемот современ егзодус во Македонија. Официјалните бројки покажуваат, а нашите болни разделби потврдуваат дека од државата секој ден, секој час се иселуваат наши најблиски и сакани.

Причините за ваквите заминувања се сé полошата економска состоја и генералното влошување на сите животни и општествени сегменти. Нашето семејство, нашите пријатели, нашите комшии се делат од татковината и најблиските втурнати во потрага по парче леб.

Политиките на власта се директно одоговрни за ова масовно исселување, немаштија и бесперспективност“, пишуваше во повикот.

Перформансот има хуманитарен карактер и оние обувки кои ќе може да се употребат ќе бидат подарени во хуманитарни цели, а останатите кои не се за употреба ќе бидат дел од уметничко дело на група автори посветено на иселувањето.