Македонската фудбалска репрезентација утрово ја напушти својата скопска база, хотелот „Хилтон“ упатувајќи се кон Букурешт, каде од денеска ќе се подготвува за ЕВРО 2020, а истовремено таму ќе ги игра трите средби против Австрија, Украина и Холандија.

„Националниот тим на пат кон Букурешт го испратија и претседателот на ФФМ, Муамед Сејдини како и генералниот секретар Филип Поповски, искажувајќи силна желба за мирен тек на подготовките и во Романија и успешни настапи на Европското првенство“, соопшти Фудбалската федерација на Македонија

Инаку, македонските фудбалери не дочекаа прием во Владата иако премиерот Зоран Заев го најави тоа. Сејдини не е во добри односи со Владата и им забрани на најдобрите македонски фудбалери средба со премиерот.

Националниот тим за прв пат ќе настапи на едно фудбалско Европско првенство и за прв пат воопшто на едно големо натпреварување.