„Орбан не е познат по давање азил“, гласи дел од зајадливиот коментар на европратеникот Кнут Флекенштајн, по веста дека пребеганиот поранешен македонски премиер Никола Груевски очекува „згрижување“ во Унгарија од страна на тамошниот премиер Виктор Орбан за да ја избегне затворската казна и серијата други пресуди кои му се товарат.
Меѓу редови, Флекенштајн сака да каже дека Орбан е под изолација од Европската унија откако жестоко се противи за прием на илегални емигранти кои доаѓаат од Истокот во поглед на престојот, сместувањето и транзитот.
Порача дека е тешко замисливо унгарските власти да му доделат азил на поранешниот премиер во бегство.
„Тешко ми е да замислам дека унгарската влада ќе му додели азил на поранешниот премиер Никола Груевски. Прво затоа што Груевски може да биде сигурен дека ќе добие правично судење во Скопје, а второ, секогаш мислев дека Орбан не прифаќа баратели на азил во неговата земја“, напиша европратеникот.
Синоќа Европската Комисија побара почитување на владеењето на правото во земјите членки како и во земјите кандидати на ЕУ и порача дека судскиот процес не смее да се политизира.
