Mинистерот за здравство, Венко Филипче информира дека е постигнат договор со приватните специјализанти. 

Платено здравствено осигурување и платени дежурства ќе добијат приватни специјализанти кои немаат други приходи, освен надоместокот кој го земаат за работење во клиниките на Клиничкиот центар „Мајка Тереза” и другите ЈЗУ каде се обавува специјализацијата. 

„Денеска остварив средба со нивните претставници и директорите на ФЗО на РСМ и договоривме дека почнувајќи од јуни, а со исплата во јули, приватните специјализанти ќе добијат надомест за здравствено осигурување, откако претходно ќе пополнат изјава во ФЗО на РСМ дека немаат други приходи освен надоместокот кој го добиваат од државата. Дополнително, ќе им се исплаќаат и надоместоци за дежурствата во нето износ од 1800, 2700 и 3600 денари. Понатаму, приватните специјализанти како учесници во давање здравствени услуги ќе добијат и 5% бонус за борба против ковид 19. Секој месец приватните специјализанти примаат по 29.000 денари надомест, нешто што за прв пат започнавме да го исплаќаме во 2018“, соопшти министерот. 

Додава дека тие вложуваат во медицинскиот кадар, затоа што тој е столбот на системот.