Министерот за здравство, Венко Филипче, кој денеска беше во посета Геронтолошкиот завод „13 Ноември" во Ѓорче Петров, одговарајќи на новинарско прашање нагласи дека државата нема формално-правен механизам со кој ќе може да им наложи на приватните болници да ги намалат цените на здравствените услуги.

-Вчера имав состанок со медицинските директори на трите приватни болници, Ремедика, каде што не се лечат ковид-пациенти, клиниката Жан Митрев и Аџибадем Систина. Прво зборувавме за кадарот, веќе од утре треба да бидат на располагање и тоа пет лекари од Систина, двајца од Ремедика, и веројатно еден од Жан Митрев, иако првичната најава беше дека голем дел се на боледување, сепак реакоа дека еден лекар ќе биде на располагање. 

Овие лекари-специјалисти ќе бидат вклучени во ковид центрите и распоредени според системот на ротации. Втората тема за која разговаравме беа цените на здравствените услуги и иако апелирав тоа да се направи заради тоа што е криза и пандемија, доктор Жан Митрев изрази спремност и рече дека денеска ќе потврди дали ќе ги намали цените за одреден процент, а од Систина јасно ми кажаа дека тоа не можат да го направат заради тоа што немале економска логика, истакна министерот Филипче.