Претседателот на ФИФА, Џани Инфантино, ги информираше членовите на организацијата дека Светското првенство во САД, Канада и Мексико заработи 15 милијарди долари.

Првичните проценки на ФИФА беа дека Светското првенство ќе генерира 11 милијарди долари, но тие беа значително надминати. Покрај тоа, приходите од претходното Светско првенство во Катар во 2022 година беа речиси удвоени, имајќи предвид дека Катар оствари заработка од 7,6 милијарди долари.

„Ова беше спортски настан со најголема посетеност. Најголем во сите спортови. Ги надминавме сите претходни“, изјави американскиот претседател Доналд Трамп.

Најголема заработка од билети

Најголеми извори на приход беа сместувањето и продажбата на билети — по таа основа беа заработени над пет милијарди долари. За првпат, приходите од овој сегмент ги надминаа парите што ФИФА ги заработува од телевизиските права (ТВ-права).

За време на овогодишниот мундијал беше користен нов систем за продажба на билети — динамично одредување на цените, каде што цените се менуваа во зависност од интересот. Дополнително, на секундарниот пазар, ФИФА заработуваше по 15 проценти и од продавачот и од купувачот.

Посетеноста на натпреварите од 6,6 милиони гледачи ја надмина вкупната посетеност на претходните две светски првенства заедно, на кои присуствуваа 6,4 милиони луѓе. Светското првенство во 2026 година го собори и претходниот рекорд на посетеност поставен во Америка во 1994 година, кога имаше 3,5 милиони посетители.

ТВ-простор за поголем профит

Со поместувањето на Светското првенство во Катар во 2022 година во зимскиот период, ФИФА се најде во проблем бидејќи ѝ се закануваше тужба од американскиот медиум „Фокс њуз“. Фудбалската организација го реши проблемот така што му ги додели телевизиските права за овогодишното Светско првенство на „Фокс“ без тендер. Американската телевизија така ги доби правата за англиското говорно подрачје по истата цена од 485 милиони долари што ја плати и за Катар, иако на ова Светско првенство се одиграа уште 40 натпревари повеќе.

Покрај „Фокс“, за ТВ-правата за следното Светско првенство во 2030 година заинтересирани се и ESPN и NBC. Се споменува дека и стриминг-платформата Netflix започнала преговори со ФИФА, откако веќе ги откупи правата за Светското првенство за жени во 2027 и 2031 година.