ПОЛИЦИЈАТА ПРИВЕДЕ ПЕТ ЛИЦА ЗА ИСЧЕЗНУВАЊЕТО НА ВАЊА

Неколку дена трае потрагата по девојче кое исчезна во Скопје. 

„Пет лица се приведени доцна синоќа поврзани со случајот на исчезнувањето на 14 годишната Вања Ѓорчевска, истрагата има напредок но во интерес на истрагата не може повеќе да се дадат информации“, изјави денеска министерот за внатрешни работи Оливер Спасовски, пренесе Канал 5.

МИНИСТЕРКАТА ПЕТРОВСКА НАЈАВИ ДЕКА ЌЕ ГО РАЗВИВААТ ПРВИОТ ДРОН

Министерката за одбрана Славјанка Петровска денеска заедно со премиерот Димитар Ковачевски и вицепремиерот за економски прашања Фатмир Битиќи беше во посета на компанијата “ATS Ammunition” во Самоков, дел од групацијата “ATS Group” чија дејност е производство за заштитна и воена опрема и вооружување.

По обиколката на капацитетите министерката Петровска порача дека ова е сериозна компанија со голем квалитет што е многу важно во време кога се соочуваме со сериозни предизвици за да се задоволат потребите на воената индустрија. Петровска информираше дека оваа компанија веќе е регистрирана за учество на НАТО пазарот и додаде дека интересот на компаниите за комплетирање на овој процес се зголемува.

ПРЕПОРАКИ ЗА СТРУМИЦА ПОРАДИ ЗАГАДЕНИОТ ВОЗДУХ

Многу високо загадување на воздухот има во Струмица, а Министерството за животна средина ги активираше препораките. 

Струмица е најзагаден град во државата, а поради енормното аерозагадување претходните два дена, Министерството за животна средина и просторно планирање ги активираше препораките и мерките за надминат праг на алармирање на суспендирани честички ПМ 10 во Струмица.

Се препорачува сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар.

СНЕЖНО НЕВРЕМЕ ВО ДЕЛОВИ ОД ЕВРОПА

Снежно невреме има во Германија, Австрија и Швајцарија, а според најавите во Хрватска на планините се очекува да наврне половина метар снег. 

Региони на Германија, Швајцарија и Австрија се закочени поради снегот. Посебно хаотично е во Баварија каде наврна огромно количество снег.