ГРУЕВСКИ ДОБИ ОСЛОБОДИТЕЛНА ПРЕСУДА ЗА „ТАЛИР 2“

Основниот Кривичен суд Скопје го ослободи од обвинение поранешниот премиер Никола Груевски за случајот "Талир 2", за пречекорување на службени овластувања и противправно финансирање на изградбата на партиското седиште на ВМРО-ДПМНЕ. 

Судијката Даниела Алексовска, во објава на пресудата изјави дека за овој случај треба да се имаат предвид измените на КЗ од 2023, а со кои настапи и измена на обвинението. 

ТАТЈАНА ДИМИТРОВСКА ДОБИ УСЛОВНА КАЗНА ОД ЕДНА ГОДИНА

Основниот кривичен суд Скопје денеска ја објави пресудата во предметот против поранешната претседателка на Државната комисија за спречување на корупцијата (ДКСК) Татјана Димитровска, изрекувајќи ѝ единствена условна казна затвор од една година за кривичните дела оддавање службена тајна и компјутерски фалсификат.

Судот ја прогласи Димитровска за виновна за оддавање службена тајна, за што ѝ утврди казна затвор од осум месеци, како и за компјутерски фалсификат, за што ѝ е утврдена казна затвор од шест месеци. За двете кривични дела изречена е една единствена казна затвор во времетраење од една година, која нема да се изврши доколку обвинетата во наредните три години не стори ново кривично дело.

Во истиот предмет, Судот го прогласи за виновен ревизорот Миле Столевски за кривичното дело компјутерски фалсификат. Нему му е изречена алтернативна мерка условна осуда, со која му се утврдува казна затвор од шест месеци доколку во рок од две години не стори ново кривично дело.

ОЈО ПОВЕДЕ ПОСТАПКА ПРОТИВ ТРИ ЛИЦА ЗА ВРСНИЧКОТО НАСИЛСТВО ВО КУМАНОВО

Обвинителството поведе постапка против три лица за врсничко насилство во Куманово, а две од осомничените се малолетнички. 

Основното јавно обвинителство Куманово поведе постапка против една 18-годишна девојка, а за две малолетнички на возраст  од 15 и 14 години е поднесено барање за поведување подготвителна постапка до судијата за деца при Основниот суд во Куманово, бидејќи заедно учествувале во дејствија на кривично дело – Насилство согласно член 386 став 3 во врска со став 1 од Кривичниот законик.

Над 700.000 луѓе во земјава лани не барале работа од различни причини, некои поради мајчинство, некои поради нарушено здравје, семејни причини, грижа за друго лице, влегување во пензија или сметаат дека нема слободни работни места. Меѓу нив доминираат жените.

Фирмата Џови Компани, во сопственост на Ацо Божинов, таткото на градоначалникот на Ново Село, Ѓорѓе Божинов, добива договори за јавни набавки во соседните општини Струмица и Босилово.