МИЦКОСКИ РЕЧЕ ДЕКА ПРАГОТ НА ТОЛЕРАНЦИЈА ЗА „БЕЗБЕДЕН ГРАД“ ПОНАТАМУ ЌЕ СЕ НАМАЛУВА

Премиерот Христијан Мицкоски изјави дека првиот ден од функционирањето на системот  „Безбеден град“ поминал без поплаки од граѓаните.

Тој откри важен детал за начинот на кој ќе функционира системот во почетната фаза – Владата и МВР одлучиле да го зголемат прагот на толеранција на 15 проценти над дозволената брзина. Ова е над европскиот стандард кој изнесува 10 проценти.

„Владата и МВР одлучија на стартот да го зголемат прагот на толеранција, со цел граѓаните постепено да се навикнат на новиот систем и да не бидат казнувани веднаш. Како што ќе се навикнуваат возачите, така постепено ќе се враќаме во европските рамки (10 oтсто)“, изјави Мицкоски.

МАРИХУАНА ОД МАКЕДОНИЈА Е ЗАПЛЕНЕТА ВО СРБИЈА

Пет лица се осомничени во случајот со рекордната заплена на повеќе од пет тони марихуана пронајдени во четвртокот во селото Коњух, во близина на Крушевац, и  се бранеа со молчење пред Обвинителството за организиран криминал на Србија.

Како што соопшти обвинителството, јавниот обвинител издал наредба за спроведување истрага против Александар Мијајловиќ, Небојша Спасојевиќ, Раде Спасојевиќ, Иван Драгниќ и Урош Младеновски, поради сомнение за кривично дело неовластено производство и пуштање во промет на наркотични дроги.

Српскиот претседател Александар Вучиќ тврди дека Србија не е вмешана во поседувањето на петтe тони марихуана со потекло од Македонија. 

ФИЛИПЧЕ ВЕЛИ ДЕКА ВЛАДАТА ДО 2028 ГОДИНА НЕМА ДА ИЗДРЖИ

Економска криза, а потоа и „мигранти за пари“, се сценаријата што ја очекуваат државата, изјави лидерот на опозицискиот Социјалдемократски сојуз (СДСМ), Венко Филипче, во денешното интервју за Радио Слободна Европа (РСЕ).

Ја обвинува власта за изолација на државата од европскиот пат, но и предупредува за врски со властите во Србија и Унгарија, но и со Русија.

За случувањата во матичната партија, додава дека не стравува од пуч затоа што на последниот конгрес бил успешен, каде што добил искрени и чесни сугестии.