МИЦКОСКИ НЕМА ДА ОДГОВОРИ НА БАРАЊЕТО НА АРСОВСКА ЗА НАБАВКА НА АВТОБУСИ

Премиерот Христијан Мицкоски нема да набави 250 автобуси како што побара скопската градоначалничка, Данела Арсовска во писмото. 

Понудивме конкретни решенија кои доколку Мицкоски ги прифатеше ќе значеа дека навистина се грижи за Скопје и скопјани, велат од Град Скопје, откако од Владата соопштија дека премиерот Христијан Мицкоски нема да излезе во пресрет на барањето на градоначалничката Данела Арсовска за набавка на автобуси. Оттаму ја повикаа Арсовска да почне да си ги врши обврските. Од Град Скопје велат дека Мицкоски само сака да создаде конфликт. 

ПРИВАТНИТЕ ПРЕВОЗНИЦИ НАЈАВИЈА РЕДУЦИРАН ПРЕВОЗ

Oд понеделник приватните превозници нема да возат во Скопје со целосниот возен ред. 

Тие одлучиле да воведат редуциран сообраќај, при што на секоја линија ќе сообраќа по еден автобус само еднаш во денот, наутро или навечер. Тоа значи дека од понеделник на скопските улици ќе има 150 автобуси помалку. 

НАЈАВЕН СОБИР ПРЕД МОН, НЕДЕЛКОВ СЕ ОГРАДИ

Јаким Неделков вели дека СОНК утре нема да учествува на никакви протести.

Министерката за образование, Весна Јаневска вели дека протестите најавени за утре ги организира СДСМ кој остави буџетска дупка од пет милијарди. 

ВО ШТИПСКО НОВО СЕЛО Е ПОДИГНАТ СПОМЕНИК НА ТОДОР АЛЕКСАНДРОВ

Во штипско Ново село по повод 100 годишнината од загинувањето за Тодор Александров, македонски политички водач, војвода и еден од водачите на ВМРО е подигнат споменик, а иницијативата дојде од патриотското здружение „Мише Развигоров“ за што позитивно се изјасни и советот на локалната самоуправа.

„Целта на убиството на Тодор Александров била да згасне идејата за независна суверена Македонија. Ние,  после сто години од неговата смрт го продолжуваме неговото дело преку поставување на ова спомен обележје. Нека му е вечна славата, нека продолжи борбата за Македонија“, изјави штипскиот градоначалник Иван Јорданов.